LIC Golden Jubilee Scholarship 2026: LIC ಗೋಲ್ಡನ್ ಜೂಬಿಲಿ ಸ್ಕಾಲರ್ಶಿಪ್ 2026 – SSLC, PUC ಪಾಸ್ ವಿದ್ಯಾರ್ಥಿಗಳಿಗೆ ವರ್ಷಕ್ಕೆ ₹50,000 ವಿದ್ಯಾರ್ಥಿವೇತನ – ಸೆಪ್ಟೆಂಬರ್ 30 ಕೊನೆಯ ದಿನ
ಹತ್ತನೇ ತರಗತಿ ಅಥವಾ ದ್ವಿತೀಯ ಪಿಯುಸಿ ತೇರ್ಗಡೆಯಾಗಿ ಮುಂದಿನ ಹಂತದ ಓದಿಗೆ ಹೆಜ್ಜೆ ಇಡುತ್ತಿರುವ ಬಡ ಹಾಗೂ ಪ್ರತಿಭಾವಂತ ವಿದ್ಯಾರ್ಥಿಗಳಿಗೆ ಭಾರತೀಯ ಜೀವ ವಿಮಾ ನಿಗಮದಿಂದ ಮತ್ತೊಂದು ಸಿಹಿ ಸುದ್ದಿ ಬಂದಿದೆ.
ಎಲ್ಐಸಿ ಗೋಲ್ಡನ್ ಜೂಬಿಲಿ ಫೌಂಡೇಷನ್ ಅಡಿಯಲ್ಲಿ ನಡೆಯುವ ‘ಗೋಲ್ಡನ್ ಜೂಬಿಲಿ ಸ್ಕಾಲರ್ಶಿಪ್ ಯೋಜನೆ 2026’ಗೆ ಆನ್ಲೈನ್ ಅರ್ಜಿ ಸಲ್ಲಿಕೆ ನಡೆಯುತ್ತಿದ್ದು, ಕೊನೆಯ ದಿನಾಂಕ ಸೆಪ್ಟೆಂಬರ್ 30, 2026. ಅರ್ಹರಾದವರಿಗೆ ಕೋರ್ಸ್ ಅನುಸಾರ ವರ್ಷಕ್ಕೆ ₹15,000 ರಿಂದ ₹50,000 ವರೆಗೆ ನೇರವಾಗಿ ಬ್ಯಾಂಕ್ ಖಾತೆಗೆ ಹಣ ಬರಲಿದೆ.
ಈ ಯೋಜನೆ ಸ್ನಾತಕೋತ್ತರ ಕೋರ್ಸ್ಗಳಿಗೆ ಅಲ್ಲ. 2026-27ನೇ ಶೈಕ್ಷಣಿಕ ವರ್ಷದಲ್ಲಿ ಮೊದಲ ವರ್ಷಕ್ಕೆ ಪ್ರವೇಶ ಪಡೆದ ವಿದ್ಯಾರ್ಥಿಗಳಿಗೆ ಮಾತ್ರ. ಕರ್ನಾಟಕ ಸೇರಿದಂತೆ ದೇಶಾದ್ಯಂತ ಗ್ರಾಮೀಣ ಹಾಗೂ ನಗರದ ಬಡ ಕುಟುಂಬಗಳ ಮಕ್ಕಳು ಇದರಿಂದ ನೇರ ಪ್ರಯೋಜನ ಪಡೆಯಬಹುದು.
ಯಾರು ಅರ್ಜಿ ಹಾಕಬಹುದು.?
ಎರಡು ವಿಭಾಗಗಳಿವೆ. ಮೊದಲನೆಯದು ಸಾಮಾನ್ಯ ವಿದ್ಯಾರ್ಥಿವೇತನ. ಇದಕ್ಕೆ 2023-24, 2024-25 ಅಥವಾ 2025-26ನೇ ವರ್ಷದಲ್ಲಿ 12ನೇ ತರಗತಿ ಅಥವಾ ಸಮಾನ ಪರೀಕ್ಷೆಯಲ್ಲಿ ಕನಿಷ್ಠ 60 ಶೇಕಡಾ ಅಂಕ ಅಥವಾ ಸಮಾನ ಸಿಜಿಪಿಎ ಪಡೆದು, 2026-27ರಲ್ಲಿ ವೈದ್ಯಕೀಯ, ಎಂಜಿನಿಯರಿಂಗ್, ಸಾಮಾನ್ಯ ಪದವಿ, ಸಂಯೋಜಿತ ಕೋರ್ಸ್, ಡಿಪ್ಲೊಮಾ, ವೃತ್ತಿಪರ ಕೋರ್ಸ್ ಅಥವಾ ಐಟಿಐಗೆ ಮೊದಲ ವರ್ಷ ಪ್ರವೇಶ ಪಡೆದಿರಬೇಕು.
ಎರಡನೆಯದು ವಿಶೇಷ ವಿದ್ಯಾರ್ಥಿವೇತನ. ಇದು 10ನೇ ತರಗತಿ ಪಾಸಾದ ನಂತರ ಪ್ಲಸ್ ಟು, ವೃತ್ತಿಪರ, ಡಿಪ್ಲೊಮಾ ಅಥವಾ ಐಟಿಐಗೆ ಸೇರಿದವರಿಗೆ. ಇಲ್ಲಿಯೂ ಕನಿಷ್ಠ 60 ಶೇಕಡಾ ಅಂಕ ಬೇಕು. ಹೆಣ್ಣು ಮಕ್ಕಳ ಶಿಕ್ಷಣಕ್ಕೆ ಪ್ರೋತ್ಸಾಹ ನೀಡುವ ಉದ್ದೇಶದಿಂದ ಈ ವಿಭಾಗವನ್ನು ವಿಶೇಷವಾಗಿ ಇರಿಸಲಾಗಿದೆ.
ಕುಟುಂಬದ ಎಲ್ಲಾ ಮೂಲಗಳಿಂದ ಬರುವ ವಾರ್ಷಿಕ ಆದಾಯ ₹4,50,000 ಮೀರಬಾರದು. ₹2,50,000ಕ್ಕಿಂತ ಕಡಿಮೆ ಆದಾಯದ ಅಭ್ಯರ್ಥಿಗಳಿಗೆ ಆಯ್ಕೆಯಲ್ಲಿ ಆದ್ಯತೆ. ಒಂದು ಕುಟುಂಬದಿಂದ ಸಾಮಾನ್ಯವಾಗಿ ಒಬ್ಬರೇ ಆಯ್ಕೆಯಾಗುತ್ತಾರೆ. ಆದರೆ ಎರಡನೇ ಅಭ್ಯರ್ಥಿ ಹೆಣ್ಣು ಮಗುವಾಗಿದ್ದರೆ ವಿನಾಯಿತಿ ಇದೆ.
ಕೋರ್ಸ್ವಾರು ಎಷ್ಟು ಹಣ ಸಿಗುತ್ತದೆ.?
ಆಯ್ಕೆಯಾದವರಿಗೆ ಕೋರ್ಸ್ ಮುಗಿಯುವವರೆಗೆ ಪ್ರತಿ ವರ್ಷ ಎರಡು ಕಂತುಗಳಲ್ಲಿ ಹಣ ಬರುತ್ತದೆ. ವೈದ್ಯಕೀಯ (ಎಂಬಿಬಿಎಸ್, ಬಿಎಎಂಎಸ್, ಬಿಎಚ್ಎಂಎಸ್, ಬಿಡಿಎಸ್) ಓದುವವರಿಗೆ ವರ್ಷಕ್ಕೆ ₹50,000. ಎಂಜಿನಿಯರಿಂಗ್ (ಬಿಇ, ಬಿಟೆಕ್, ಬಿಆರ್ಕ್)ಗೆ ₹40,000. ಸಾಮಾನ್ಯ ಪದವಿ, ಡಿಪ್ಲೊಮಾ, ವೃತ್ತಿಪರ ಕೋರ್ಸ್, ಐಟಿಐಗೆ ₹20,000. 10ನೇ ತರಗತಿ ನಂತರದ ವಿಶೇಷ ವಿದ್ಯಾರ್ಥಿವೇತನ ₹15,000.
ಇಂಟರ್ನ್ಶಿಪ್ ಅಥವಾ ಸ್ಟೈಪೆಂಡ್ ಅವಧಿಗೆ ಈ ಹಣ ಅನ್ವಯಿಸುವುದಿಲ್ಲ. ಮುಂದಿನ ವರ್ಷಗಳಲ್ಲಿ ನವೀಕರಣಕ್ಕೆ ನಿಗದಿತ ಅಂಕ ಮತ್ತು ಹಾಜರಾತಿ ನಿಯಮಗಳನ್ನು ಪಾಲಿಸಬೇಕು.
ಅಗತ್ಯ ದಾಖಲೆಗಳು.?
ಅಂಕಪಟ್ಟಿ, ಕುಟುಂಬ ಆದಾಯ ಪ್ರಮಾಣಪತ್ರ, ಪ್ರಸ್ತುತ ವರ್ಷದ ಪ್ರವೇಶ ರುಜುವಾತು, ಬ್ಯಾಂಕ್ ಪಾಸ್ಬುಕ್, ಆಧಾರ್, ಪಾಸ್ಪೋರ್ಟ್ ಗಾತ್ರದ ಫೋಟೋ ಅಗತ್ಯ. ಜಾತಿ ಪ್ರಮಾಣಪತ್ರ ಅಗತ್ಯವಿದ್ದಲ್ಲಿ ಅದನ್ನೂ ಸಲ್ಲಿಸಬೇಕು. ಬ್ಯಾಂಕ್ ಖಾತೆ ಸಕ್ರಿಯವಾಗಿರಬೇಕು. ನಿಷ್ಕ್ರಿಯ ಖಾತೆಗೆ ಹಣ ಹೋಗುವುದಿಲ್ಲ.
ಅರ್ಜಿ ಸಲ್ಲಿಸುವುದು ಹೇಗೆ.?
ಕೇವಲ ಆನ್ಲೈನ್. ಅಧಿಕೃತ ವೆಬ್ಸೈಟ್ https://licindia.in ಗೆ ಹೋಗಿ ಹೋಮ್ ಪೇಜ್ನಲ್ಲಿ ಗೋಲ್ಡನ್ ಜೂಬಿಲಿ ಸ್ಕಾಲರ್ಶಿಪ್ ಲಿಂಕ್ ಕ್ಲಿಕ್ ಮಾಡಿ. ವೈಯಕ್ತಿಕ, ಶೈಕ್ಷಣಿಕ, ಆದಾಯ ಮತ್ತು ಬ್ಯಾಂಕ್ ವಿವರ ಭರ್ತಿ ಮಾಡಿ ದಾಖಲೆಗಳನ್ನು ಅಪ್ಲೋಡ್ ಮಾಡಿ. ಸಬ್ಮಿಟ್ ಮಾಡಿದ ನಂತರ ಇಮೇಲ್ಗೆ ಸ್ವೀಕೃತಿ ಬರುತ್ತದೆ. ಪಿನ್ ಕೋಡ್ ಆಧಾರದಲ್ಲಿ ಅರ್ಜಿ ಸಂಬಂಧಿತ ವಿಭಾಗೀಯ ಕಚೇರಿಗೆ ಹೋಗುತ್ತದೆ.
ಹಾರ್ಡ್ ಕಾಪಿ ಕಳುಹಿಸುವ ಅಗತ್ಯವಿಲ್ಲ. ಖಾಲಿ ಕ್ಷೇತ್ರ ಬಿಟ್ಟರೆ ಅರ್ಜಿ ಸಲ್ಲುವುದಿಲ್ಲ. ಮೊಬೈಲ್ ಮತ್ತು ಇಮೇಲ್ ಸರಿಯಾಗಿರಬೇಕು. ಮುಂದಿನ ಎಲ್ಲಾ ಸಂಪರ್ಕ ಅದೇ ಮೂಲಕ.
ಆಯ್ಕೆ ಹೇಗೆ ನಡೆಯುತ್ತದೆ.?
ದೇಶದ 112 ವಿಭಾಗೀಯ ಕಚೇರಿಗಳು ಪ್ರತಿ ಕಚೇರಿಯಲ್ಲಿ ನಿಗದಿತ ಸಂಖ್ಯೆಯಲ್ಲಿ ಆಯ್ಕೆ ಮಾಡುತ್ತವೆ. ಅಂಕಗಳ ಆಧಾರದಲ್ಲಿ ಮೆರಿಟ್ ಪಟ್ಟಿ. ಕಡಿಮೆ ಆದಾಯದ ವರ್ಗಕ್ಕೆ ಮೊದಲ ಆದ್ಯತೆ. ಪ್ರಾಥಮಿಕ ಪರಿಶೀಲನೆ ನಂತರ ಅರ್ಹರಿಗೆ ದಾಖಲೆ ಪರಿಶೀಲನೆಗೆ ಕರೆ ಬರುತ್ತದೆ. ಆಯ್ಕೆಯಾದವರಿಗೆ ಇಮೇಲ್ ಮೂಲಕ ಮಾಹಿತಿ. ಪ್ರತ್ಯೇಕ ಪರೀಕ್ಷೆ ಇಲ್ಲ.
ಇತರ ಸ್ಕಾಲರ್ಶಿಪ್ ಪಡೆಯುತ್ತಿರುವವರಿಗೆ ಈ ಯೋಜನೆ ಅನ್ವಯಿಸದಿರಬಹುದು. ನಕಲಿ ಮಾಹಿತಿ ಕಂಡುಬಂದರೆ ಅರ್ಜಿ ರದ್ದು.
ಬಡ ಕುಟುಂಬದ ಮಗು ವೈದ್ಯಕೀಯ ಅಥವಾ ಎಂಜಿನಿಯರಿಂಗ್ ಕನಸು ಕಾಣುತ್ತಿದ್ದರೆ, ಫೀಸ್ ಭಾರ ತಗ್ಗಿಸುವ ಈ ಅವಕಾಶವನ್ನು ಬಿಡಬೇಡಿ. ಸೆಪ್ಟೆಂಬರ್ 30 ರೊಳಗೆ ಅರ್ಜಿ ಪೂರ್ಣಗೊಳಿಸಿ. ವಿಳಂಬ ಮಾಡಿದರೆ ಈ ವರ್ಷದ ಅವಕಾಶ ತಪ್ಪುತ್ತದೆ. ಅಧಿಕೃತ ನಿಯಮಗಳನ್ನು ಓದಿ, ದಾಖಲೆಗಳನ್ನು ಸಿದ್ಧಪಡಿಸಿ ಇಂದೇ ಅರ್ಜಿ ಹಾಕಿ.
ರೈತರಿಗೆ ಗುಡ್ನ್ಯೂಸ್: ಸೋಲಾರ್ ಪಂಪ್ಸೆಟ್ಗಾಗಿ ₹1.5 ಲಕ್ಷ ಸಹಾಯಧನ | Solar Pump Subsidy