ಆಯುಷ್ಮಾನ್ ಭಾರತ್ ಯೋಜನೆ: ಯಾರಿಗೆ ಅರ್ಹತೆ? ಯಾವ ಚಿಕಿತ್ಸೆ ಸಿಗುತ್ತೆ? ಕಾರ್ಡ್ ಹೇಗೆ ಮಾಡಿಸುವುದು?
ಆರ್ಥಿಕವಾಗಿ ದುರ್ಬಲ ಕುಟುಂಬಗಳಿಗೆ ಆರೋಗ್ಯ ಸೇವೆ ಸುಲಭವಾಗಿ ದೊರೆಯುವಂತೆ ಕೇಂದ್ರ ಸರ್ಕಾರ ಜಾರಿಗೊಳಿಸಿರುವ ಆಯುಷ್ಮಾನ್ ಭಾರತ್ – ಪ್ರಧಾನ ಮಂತ್ರಿ ಜನ ಆರೋಗ್ಯ ಯೋಜನೆ (PM-JAY) ವಿಶ್ವದ ಅತಿದೊಡ್ಡ ಆರೋಗ್ಯ ವಿಮಾ ಯೋಜನೆಯಾಗಿದೆ.
ಪ್ರತಿ ಅರ್ಹ ಕುಟುಂಬಕ್ಕೆ ವರ್ಷಕ್ಕೆ ರೂ. 5 ಲಕ್ಷದವರೆಗೆ ನಗದುರಹಿತ ಚಿಕಿತ್ಸೆ ಲಭ್ಯವಾಗುತ್ತದೆ. ಜೇಬಿನಿಂದ ಒಂದು ಪೈಸೆಯನ್ನೂ ಖರ್ಚು ಮಾಡದೆ ಗುಣಮಟ್ಟದ ಆಸ್ಪತ್ರೆ ಸೇವೆ ಪಡೆಯುವ ಅವಕಾಶ ಇದು.
ಯೋಜನೆಯ ಮುಖ್ಯ ಉದ್ದೇಶವೆಂದರೆ ಬಡ ಮತ್ತು ನಿರ್ಗತಿಕ ಕುಟುಂಬಗಳು ಆರೋಗ್ಯ ಸಮಸ್ಯೆಯಿಂದ ಆರ್ಥಿಕವಾಗಿ ನಾಶವಾಗದಂತೆ ರಕ್ಷಿಸುವುದು. ದೇಶಾದ್ಯಂತ ಸರ್ಕಾರಿ ಹಾಗೂ ಎಂಪನೇಲ್ಡ್ ಖಾಸಗಿ ಆಸ್ಪತ್ರೆಗಳಲ್ಲಿ ಈ ಸೌಲಭ್ಯ ಲಭ್ಯವಿದೆ.
ಆಯುಷ್ಮಾನ್ ಕಾರ್ಡ್ ಎಂದರೇನು? ಹೇಗೆ ಕಾರ್ಯನಿರ್ವಹಿಸುತ್ತದೆ.?
ಆಯುಷ್ಮಾನ್ ಕಾರ್ಡ್ ಪ್ರತಿ ಅರ್ಹ ಕುಟುಂಬಕ್ಕೆ ವರ್ಷಕ್ಕೆ ರೂ. 5 ಲಕ್ಷದ ನಗದುರಹಿತ ಆರೋಗ್ಯ ವಿಮೆಯನ್ನು ನೀಡುತ್ತದೆ. ಆಸ್ಪತ್ರೆಗೆ ದಾಖಲಾಗುವಾಗ ರೋಗಿ ಯಾವುದೇ ಹಣ ಪಾವತಿಸಬೇಕಾಗಿಲ್ಲ.
ಎಲ್ಲಾ ವೆಚ್ಚವನ್ನು ಸರ್ಕಾರ ನೇರವಾಗಿ ಆಸ್ಪತ್ರೆಗೆ ಪಾವತಿಸುತ್ತದೆ. ಕಾರ್ಡ್ ದೇಶಾದ್ಯಂತ ಪೋರ್ಟಬಲ್ ಆಗಿದ್ದು, ಯಾವುದೇ ರಾಜ್ಯದ ಎಂಪನೇಲ್ಡ್ ಆಸ್ಪತ್ರೆಯಲ್ಲಿ ಬಳಸಬಹುದು. ಕುಟುಂಬ ಸದಸ್ಯರ ಸಂಖ್ಯೆ ಅಥವಾ ವಯಸ್ಸಿನ ಮೇಲೆ ಯಾವುದೇ ಮಿತಿ ಇಲ್ಲ.
ಯಾರು ಅರ್ಹರು.?
ಯೋಜನೆಯ ಅರ್ಹತೆ ಮುಖ್ಯವಾಗಿ 2011ರ ಸಾಮಾಜಿಕ-ಆರ್ಥಿಕ ಮತ್ತು ಜಾತಿ ಜನಗಣತಿ (SECC) ದತ್ತಾಂಶವನ್ನು ಆಧರಿಸಿದೆ.
ಗ್ರಾಮೀಣ ಪ್ರದೇಶದಲ್ಲಿ:
ಕಚ್ಚಾ ಮನೆ ಹೊಂದಿರುವ ಕುಟುಂಬಗಳು, ಭೂರಹಿತ ದಿನಗೂಲಿ ಕಾರ್ಮಿಕರು, ಚಿಂದಿ ಆಯುವವರು, ಭಿಕ್ಷುಕರು, ಮನೆಕೆಲಸಗಾರರು, ಪರಿಶಿಷ್ಟ ಜಾತಿ ಮತ್ತು ಪರಿಶಿಷ್ಟ ಪಂಗಡ ಕುಟುಂಬಗಳು, 16ರಿಂದ 59 ವರ್ಷದೊಳಗಿನ ಸಮರ್ಥ ಪುರುಷ ಸದಸ್ಯರಿಲ್ಲದ ಕುಟುಂಬಗಳು ಅರ್ಹರು.
ನಗರ ಪ್ರದೇಶದಲ್ಲಿ:
ಬೀದಿ ವ್ಯಾಪಾರಿಗಳು, ರಿಕ್ಷಾ ಚಾಲಕರು, ನಿರ್ಮಾಣ ಕಾರ್ಮಿಕರು, ನೈರ್ಮಲ್ಯ ಕಾರ್ಮಿಕರು, ವರ್ಣಚಿತ್ರಕಾರರು, ಪ್ಲಂಬರ್ಗಳು, ಟೈಲರ್ಗಳು, ಚಾಲಕರು, ಭದ್ರತಾ ಸಿಬ್ಬಂದಿ ಮುಂತಾದ ವೃತ್ತಿಗಳು ಸೇರಿವೆ.
ವಿಶೇಷ ವರ್ಗ – 70 ವರ್ಷ ಮತ್ತು ಅದಕ್ಕಿಂತ ಹೆಚ್ಚಿನವರು:
70 ವರ್ಷ ಮತ್ತು ಅದಕ್ಕಿಂತ ಹೆಚ್ಚಿನ ವಯಸ್ಸಿನ ಎಲ್ಲಾ ಭಾರತೀಯ ನಾಗರಿಕರು ಆದಾಯ ಮಿತಿಯನ್ನು ಲೆಕ್ಕಿಸದೆ ಅರ್ಹರು. ಅವರಿಗೆ ಪ್ರತ್ಯೇಕವಾಗಿ ರೂ. 5 ಲಕ್ಷದ ಕವರ್ ಲಭ್ಯವಾಗುತ್ತದೆ. ಈಗಾಗಲೇ ಕುಟುಂಬದಲ್ಲಿ ಯೋಜನೆ ಇದ್ದರೆ ಹಿರಿಯರಿಗೆ ಹೆಚ್ಚುವರಿ ಟಾಪ್-ಅಪ್ ಕವರ್ ಸಿಗುತ್ತದೆ.
ಯಾರು ಅರ್ಹರಲ್ಲ.?
ಶಾಶ್ವತ ಮನೆ, ಕಾರು, ಟ್ರ್ಯಾಕ್ಟರ್ ಹೊಂದಿರುವವರು, ಸರ್ಕಾರಿ ನೌಕರರು, ಆದಾಯ ತೆರಿಗೆ ಪಾವತಿದಾರರು, 5 ಎಕರೆಗಿಂತ ಹೆಚ್ಚು ಕೃಷಿ ಭೂಮಿ ಹೊಂದಿರುವವರು ಅಥವಾ ತಿಂಗಳಿಗೆ ರೂ. 10,000ಕ್ಕಿಂತ ಹೆಚ್ಚು ಆದಾಯ ಹೊಂದಿರುವ ಕುಟುಂಬಗಳು ಸಾಮಾನ್ಯವಾಗಿ ಅರ್ಹರಲ್ಲ. ಆದರೆ 70 ವರ್ಷ ಮೇಲ್ಪಟ್ಟವರಿಗೆ ಈ ನಿರ್ಬಂಧಗಳು ಅನ್ವಯಿಸುವುದಿಲ್ಲ.
ಯಾವ ಚಿಕಿತ್ಸೆಗಳು ಲಭ್ಯ.?
ಯೋಜನೆಯಡಿ 1,900ಕ್ಕೂ ಹೆಚ್ಚು ವೈದ್ಯಕೀಯ ಮತ್ತು ಶಸ್ತ್ರಚಿಕಿತ್ಸಾ ಪ್ಯಾಕೇಜ್ಗಳು ಸೇರಿವೆ. ಮೊದಲಿನಿಂದಲೇ ಅಸ್ತಿತ್ವದಲ್ಲಿರುವ ಕಾಯಿಲೆಗಳಿಗೂ ಕವರ್ ಇದೆ. ಕಾಯುವ ಅವಧಿ ಇಲ್ಲ.
ಪ್ರಮುಖವಾಗಿ ಒಳಗೊಂಡಿರುವುದು:
ಹೃದಯ ಸಂಬಂಧಿ ಚಿಕಿತ್ಸೆಗಳು (ಆಂಜಿಯೋಪ್ಲ್ಯಾಸ್ಟಿ, ಬೈಪಾಸ್), ಕ್ಯಾನ್ಸರ್ ಚಿಕಿತ್ಸೆ (ಕಿಮೊಥೆರಪಿ, ರೇಡಿಯೊಥೆರಪಿ), ಮೊಣಕಾಲು-ಸೊಂಟ ಬದಲಿ, ಮೆದುಳಿನ ಶಸ್ತ್ರಚಿಕಿತ್ಸೆ, ಡಯಾಲಿಸಿಸ್, ಪಿತ್ತಕೋಶದ ಕಲ್ಲು, ಹರ್ನಿಯಾ, ಅಪೆಂಡಿಕ್ಸ್, ಕಣ್ಣಿನ ಪೊರೆ, ಹೆರಿಗೆ ಮತ್ತು ನವಜಾತ ಶಿಶುಗಳ ತೀವ್ರ ನಿಗಾ ಸೇರಿವೆ.
ಆಸ್ಪತ್ರೆಗೆ ದಾಖಲಾಗುವ ಮೂರು ದಿನಗಳ ಮೊದಲು ಮತ್ತು ಡಿಸ್ಚಾರ್ಜ್ ಆದ 15 ದಿನಗಳವರೆಗಿನ ಔಷಧಿ ಹಾಗೂ ಪರೀಕ್ಷೆಗಳು, ಸಾರಿಗೆ ಭತ್ಯೆ ಸಹ ಒಳಗೊಂಡಿದೆ.
ಯಾವುದನ್ನು ಒಳಗೊಂಡಿಲ್ಲ.?
ಹೊರರೋಗಿ (OPD) ಚಿಕಿತ್ಸೆ, ಕಾಸ್ಮೆಟಿಕ್ ಮತ್ತು ಪ್ಲಾಸ್ಟಿಕ್ ಸರ್ಜರಿ, ಬಂಜೆತನ/ಐವಿಎಫ್ ಚಿಕಿತ್ಸೆ, ಸಂಕೀರ್ಣ ಅಂಗಾಂಗ ಕಸಿ, ವ್ಯಸನ ಮುಕ್ತಿ ಕಾರ್ಯಕ್ರಮಗಳು ಮತ್ತು ವೈಯಕ್ತಿಕ ತಪಾಸಣೆಗಳು ಈ ಯೋಜನೆಯ ವ್ಯಾಪ್ತಿಯಿಂದ ಹೊರಗುಳಿಯುತ್ತವೆ.
ಆಯುಷ್ಮಾನ್ ಕಾರ್ಡ್ ಹೇಗೆ ಪಡೆಯುವುದು.?
ಅರ್ಹರಾಗಿದ್ದರೆ ಮೂರು ಸುಲಭ ವಿಧಾನಗಳಿವೆ.
ಆನ್ಲೈನ್ ಮೂಲಕ:
ಅಧಿಕೃತ ಫಲಾನುಭವಿ ಪೋರ್ಟಲ್ಗೆ ಭೇಟಿ ನೀಡಿ: [https://beneficiary.nha.gov.in/](https://beneficiary.nha.gov.in/)
ಮೊಬೈಲ್ ಸಂಖ್ಯೆ ನಮೂದಿಸಿ OTP ಮೂಲಕ ಲಾಗಿನ್ ಆಗಿ. ಅರ್ಹತೆ ಪರಿಶೀಲಿಸಿ, ಆಧಾರ್ ಆಧಾರಿತ ಇ-ಕೆವೈಸಿ ಪೂರ್ಣಗೊಳಿಸಿ ಕಾರ್ಡ್ ಡೌನ್ಲೋಡ್ ಮಾಡಿಕೊಳ್ಳಿ.
ಆಯುಷ್ಮಾನ್ ಆ್ಯಪ್ ಮೂಲಕ:
ಗೂಗಲ್ ಪ್ಲೇ ಸ್ಟೋರ್ನಿಂದ ಆಯುಷ್ಮಾನ್ ಆ್ಯಪ್ ಡೌನ್ಲೋಡ್ ಮಾಡಿ, ಫಲಾನುಭವಿ ಆಗಿ ಲಾಗಿನ್ ಆಗಿ ಇ-ಕೆವೈಸಿ ಮಾಡಿ ಕಾರ್ಡ್ ಪಡೆಯಿರಿ.
ಸಿಎಸ್ಸಿ ಅಥವಾ ಸೇವಾ ಕೇಂದ್ರಗಳಲ್ಲಿ:
ಹತ್ತಿರದ ಸಾಮಾನ್ಯ ಸೇವಾ ಕೇಂದ್ರ (CSC), ಗ್ರಾಮ ಒನ್ ಅಥವಾ ಆಯುಷ್ಮಾನ್ ಮಿತ್ರ ಕೌಂಟರ್ಗೆ ಆಧಾರ್ ಕಾರ್ಡ್ ಮತ್ತು ಪಡಿತರ ಚೀಟಿ ತೆಗೆದುಕೊಂಡು ಹೋಗಿ. ಬಯೋಮೆಟ್ರಿಕ್ ಪರಿಶೀಲನೆಯ ನಂತರ ಕಾರ್ಡ್ ರಚಿಸಲಾಗುತ್ತದೆ.
ಅರ್ಹ ಕುಟುಂಬಗಳು ಈ ಯೋಜನೆಯ ಪ್ರಯೋಜನವನ್ನು ಕಳೆದುಕೊಳ್ಳದಂತೆ ತಕ್ಷಣ ಅರ್ಹತೆ ಪರಿಶೀಲಿಸಿ ಕಾರ್ಡ್ ಪಡೆಯಿರಿ. ಆರೋಗ್ಯ ರಕ್ಷಣೆ ಈಗ ಹಣದ ಕೊರತೆಯಿಂದ ನಿಲ್ಲುವುದಿಲ್ಲ.